Tuisblad
Plaaslike Gids
Pretoria

Pretoria
Die Jakarandastad het vele besienswaardighede vir die hele gesin. Hier is ’n paar dinge waarmee jy jou besig kan hou in Pretoria.
Die Nasionale Botaniese Tuin bied natuurliefhebbers die geleentheid om op ’n staproete te gaan. Vir meer inligting oor begeleide toere vir groepe bel Khangela Baloyi by 012 843 5194.
Al ooit gewonder hoe dit voel om in ’n klassieke, gerestoureerde stoomtrein te ry? Friends of the Rail bied uitstappies op verskeie roetes, insluitend ’n toer om Pretoria. Vir meer inligting oor dié toere bel Arno of Billy by 012 548 4090.
Laat jou hart ’n bietjie vinniger klop met ’n toer deur Pretoria se spookhuis, ook bekend as die Erasmuskasteel, in Waterkloof. Die naam Spookhuis het in die 1950’s ontstaan toe ’n Afrikaanse spookrolprent, Hier’s ons weer, op die terrein van die kasteel verfilm is. Dit is ook ’n nasionale gedenkwaardigheid.

Besprekings vooraf is noodsaaklik. Bel dr. Don Roos by 012 803 1632
Die Nasionale Dieretuin is in 1899 gestig en word as een van die bestes ter wêreld beskou. Dié dieretuin is die enigste in Suid-Afrika met nasionale status en spog met die grootste binnelandse seewatertenk in die land. Vir meer inligting besoek www.zoo.org.za of skakel 012 328 3265.
Die Voortrekkermonument
Op 16 Desember 1949 is die Voortrekkermonument, wat ter ere van die Voortrekkers deur die argitek Gerard Moerdijk ontwerp is, op ’n hoë koppie suid van Pretoria ingewy. Die Heldesaal bevat een van die wêreld se langste historiese marmerfriese. ’n Vlak laer af is die Senotaafsaal met die sentrale Senotaaf, historiese vlae en kultuurhistoriese voorwerpe. ’n Tapisserie met meer as drie miljoen borduursteke beeld die verhaal van die vrou en kind tydens die Groot Trek uit en ’n reusagtige skildery deur W.H Coetzer verbeeld die trek oor die Drakensberg. In die kelderverdieping is die Voortrekkermonument-museum.
Erfenissentrum
Die Erfenissentrum wat bestaan uit ’n argief, biblioteek, navorsingsentrum en uitstalruimte is op 5 September 2008 amptelik ingehuldig. Die tema van die uitstalling op die boonste vlak van die sentrum is: Afrikaners in die 20ste eeu; baanbrekers, bakens en brûe; “poskaartflitse” uit die geskiedenis.
Galery 20/20
Allerlei kunsskatte word in dié galery uitgestal. Die galery is ook beskikbaar vir privaatuitstallings
Fort Schanskop
Hiérdie fort uit die Anglo-Boereoorlogtydperk is een van vier wat in 1897 deur pres. Paul Kruger van die Zuid-Afrikaansche Republiek na die Jameson-inval in 1896 gebou is om Pretoria te beskerm.
Die Muur van Herinnering
Dié muur is opgerig ter herdenking aan lede van die SAW wat van 1961 tot 1994 aan diens gesterf het. Geen staatsfondse is vir hiérdie fondse gebruik nie.

Vir meer inligting besoek www.voortrekkermon.org.za
Vryheidspark

By dié weggesteekte plek met sy klipkonstruksies teen die hellings van Salvokop word die besoeker uitgedaag om eerlik oor Suid-Afrika se verlede na te dink en die genesing en begrip te vind wat nodig is vir ’n beter hede.
Dit is ’n plek waar erfenis, kultuur en spiritualiteit ineen vloei en waar ’n besoek vir menige besoeker ’n pelgrimstog kan word.
Isivivane, aan die oostelike kant van die koppie, is waar jou besoek aan dié park begin. Dit is die simboliese rusplek van die geeste van diegene wat hul lewe opgeoffer het in die stryd vir medemenslikheid en vryheid.
Voordat jy Isivivane binneloop, moet jy eers jou hande was en jou skoene uittrek.
Rotse uit al die provinsies staan om ’n sirkel van plat klip en om reiniging en suiwerheid te simboliseer, word fyn mis heeltyd by sproeiertjies uitgespuit.
By Uitstaanplek kan jy die toer weer met jou piekniekmandjie afsluit.

Só word verskillende tale, kulture en tradisies ingespan om stories van Suid-Afrika se konflikgeskiedenis te vertel.

Die park se doel is om aandag te gee aan gapings, verwringings en vooroordele in die land se geskiedenis. Daarom word ander perspektiewe op die Suid-Afrikaanse erfenis, geskiedenis en kultuur gegee.

Vryheidspark bestaan uit ’n gedenkteken, ’n interaktiewe museum en ’n tuin van herinnering.
Kortliks
Toere begin daagliks om 09:00, 12:00 en 15:00. Die koste is R20 vir volwassenes en R10 vir pensioentrekkers en kinders onder 18. Groepe van tien of meer mense kan ’n begeleide toer bespreek deur ’n e-pos te stuur na
tours@freedompark.co.za
Vir meer inligting bel Thetsh Tshivhase by 079 873 9069
Die Dinokeng-natuurreservaat
Gauteng spog nou amptelik met sy eie volwaardige natuurreservaat. Die Dinokeng-wildreservaat, noordoos van Pretoria, wat 18 500 ha beslaan, huisves tans olifante, renosters, leeus, luiperds, bruin hiënas en verskillende soorte bokke.

Dinokeng beteken “’n Plek van riviere” en word afgelei uit Tswana en Pedi. Dinokeng lê in die opvangsgebied van die Olifants- en Limpoporivier wat dit volgens sekere Afrika-kulture ‘n heilige plek met helende kragte maak.

Die reservaat is van 06:00 tot 19:00 oop vir die publiek. Daar is vyf hekke, wat 24 uur per dag, sewe dae ‘n week oop is vir normale deurgangverkeer.

Besoek www.dinokeng.co.za vir meer inligting.

Pretoria se kenmerkende pers Jakarandas
Tant Antjie ruik na gom, gesels die konsertina van Manie Erasmus en die kitaar van Johan Lourens voor die Voortrekkermonument. Twee keer ’n week speel dié twee jarelange vriende die een seties, polka, wals en vastrap ná die ander vir die toeriste én “vir volk en vaderland”. Vir die musiekmeester Manie, wat reeds op sesjarige ouderdom sy eerste langspeelplaat opgeneem het, is dit ’n voorreg om by die monument te kan musiek maak. Besoekers geniet dit baie en dit bewys boeremusiek “gesels met jou” en is nie uitsluitlik vir die Afrikanermark nie, meen hy. Johan sê ’n Franse paartjie het al begin dans en tot die “Engelse en Skotte draai hul draaie en trap hul trappe”.

Dié twee witrenosters is inwoners van die Dinokeng-wildreservaat, noordoos van Pretoria.

Besoekers voer elke jaar op Versoeningsdag gebede en spirituele rituele uit by Vryheidspark.